Politikë në Restorante e Hotele: Drejtuesit Politikë të Vlorës Larg Bazës Socialiste
Drejtuesit politikë të Partisë Socialiste në Vlorë, Bledi Çuçi dhe Piro Vëngu, duket se po shmangin takimet me bazën e partisë dhe qytetarët, duke preferuar biseda në ambiente të mbyllura si hotele dhe restorante. Sipas burimeve nga brenda PS-së, kjo qasje ka krijuar pakënaqësi mes strukturave vendore, të cilat ndihen të lëna jashtë vendimmarrjes dhe komunikimit politik.
Takimet informale të zhvilluara në mjedise private po interpretohen si një përpjekje për të mbajtur distancë nga problematikat e terrenit dhe për të ruajtur një rreth të ngushtë vendimmarrës. Aktivistë dhe anëtarë të partisë në Vlorë shprehen të zhgënjyer nga mungesa e transparencës dhe përfshirjes. “Baza socialiste është lënë në harresë. Politika po bëhet në tavolina të rezervuara,” thotë një prej tyre.
Kjo qasje po rrit tensionet brenda PS-së në Vlorë, veçanërisht në një periudhë kur pritet ristrukturim organizativ dhe përgatitje për sfidat elektorale. Deri tani, Çuçi dhe Vëngu nuk kanë dhënë ndonjë reagim mbi këto shqetësime, ndërsa kritikët brenda partisë kërkojnë kthimin e vëmendjes tek qytetarët dhe strukturat bazë.
